Feedmix Aquaculture Business Club (FABC)
Isang natataning samahan sa ikauunlad ng
pagpapalaisdaan
Ang Feedmix Aquaculture Business Club (FABC) ay inilunsad sa
tulong ng mga fish growers sa Pampanga noong nakaraang buwan na kung saan ang
mga ito ang nagsilbing unang grupo na kasapi.
Kung ating maaalala ang industriya ng pagpapalaisdaan sa Pampanga
ay nagsimula sa maliit - na kung saan ang pag-aalaga at pagpaparami ng tilapia
ay ginagawa lamang sa may likod bahay o bakuran at iba pang maliit na lugar.
Mula sa 100 ektarya noong 1995, umabot na sa mahigit 3,000 ektarya ang sakop ng
mga palaisdaan sa Candaba lamang, nagpapakilala ng mabilis na paglago ng
ganitong uri ng negosyo. Kasabay ng pagdami ng fish growers ay ang pagsulpot ng
iba pang mga negosyo na sumusuporta sa pagpapalaisdaan tulad ng pagbebenta ng
aqua feeds, pagbibili at pagbebenta ng isdang inani (fish trading), pagbebenta
ng lime at pataba, fish hatcheries at iba pang mga negosyo sa pagproseso ng
isda.
 Sa
mabilis na paglago ng negosyo ng pagpapalaisdaan, mayroon pa ring mga aspeto sa
industriya na dapat ayusin o baguhin - isa na rito ay ang pagdami ng mga
informal "middlemen", mga bumibili at nagbebenta ng mga isda na kadalasan ay
dumadayo sa mga palaisdaan pa lamang upang mamakyaw ng aanihin. Ang mga ito ay
nagpapadali ng pagbebenta ng isda para sa mga may palaisdaan at pati na rin sa
mga mamimili ng isda sa pamilihan, subalit ang ganitong pamamakyaw ay naging
sanhi ng makasarili o di patas na transaksyon na nagpapabor sa bumibili at
hindi sa nagpapalaisdaan. Ito ang nagbibigay ng suliranin sa industriya na
nakakaapekto sa iba pang negosyo, tulad ng mga kumpanya ng feeds na nahihirapan
ng magpautang o magbigay ng mas maluwag na termino sa mga palaisdaan dahil na
rin sa hirap ng paniningil at di siguradong kita.
Dagdag pa dito ang maling sistema ng pagpopondo at pagpapautang
na kung saan hirap ang mga fish growers na makautang dahil na rin sa takot ng
mga nagpapautang. Hirap din ang mga fish growers na makakuha ng kaalaman
hinggil sa bagong teknolohiya sa pagpapalaki ng tilapia at iba pang impormasyon
hinggil sa presyo at kalakaran sa pamilihan.
Dahil dito, nagpasya ang Feedmix Nutrition Specialist, Inc. na
ilunsad ang Feedmix Aquaculture Business Club o FABC na naglalayon na magkaroon
ng regular na talakayan at palitan ng impormasyon hinggil sa mga suliranin at
iba pang bagay na nakakaapekto sa industriya. Ang FABC bilang samahan ay
naglalayon ding humanap at tumukoy sa mga bagong paraan upang makakuha ng pondo
at pautang pati na insurance para sa mga kasapi nito. Ito ay magsisilbing susi
upang magkaroon ng palitan ng mahalagang kaalaman hinggil sa makabagong
teknolohiya at paraan ng pagpapalaisdaan na makapagpaparami ng ani at
magpapalaki ng kita. Ang FABC ay naglalayon ding maghanap ng iba pang sektor o
aspeto ng industriya na maaari pang paunlarin at palakihin sa pamamagitan ng
pag-aaral sa iba pang uri ng negosyo na makakatulong upang maipagpatuloy ang
pag-unlad ng industriya ng pagpapalaisdaan.
Ang FABC ay nakarehistro na sa Securities and Exchange Commission
bilang non-stock, non-profit organization. Naglalayon ang FABC na magkaroon sa
simula ng 200 kasapi. Ito ay mayroong pitong Board of Directors upang magbigay
direksyon sa FABC at magsilbing screening committee para sa mga bagong kasapi.
Ang samahan ay mangongolekta ng membership fees na idedeposito sa
bangko upang magsilbing puhunan ng FABC para makapagbigay ito ng pondo at
makapagpautang sa mga kasapi nito sa oras na mangailangan ang mga ito. Ang
pondo ay ipapautang sa mga kasapi at ito ay dadaan sa mga bangko at iba pang
institusyong pinansyal, na kung saan magkakaroon ito ng interest na mas maliit
o tulad ng itinatakdang interest sa merkado. Ang pondo ay gagamitin din bilang
kolateral para makakuha ng pondo at makautang sa mga bangko at iba pang
institusyong pinansyal, at maipautang naman sa mga kasapi nito sa oras ng
matinding pangangailangan. Ang FABC ay kukuha lamang ng maliit na porsyento ng
interest o tubo sa mga pinaikot na pondo sa mga kasapi nito. Ang matitirang
kita mula sa interest at iba pang kikitain ng samahan ay hahatiin at ipamimigay
sa mga kasapi kada dalawang taon bilang dibidendo (dividends).
Ang FABC magkakaroon ng isa o higit pang regular na pagtitipon o
miting kada buwan, upang makapagbigay kaalaman hinggil sa mga nagaganap na
pangyayari na makakaapekto sa industriya at mga kasapi nito. Dapat din itong
magkaroon ng lugar para sa mga gawain at seminar nito na makatutulong upang
mapaunlad ang kita ng mga nagpapalaisdaan at iba pang negosyo sa industriya.
Ito rin ay naglalayon upang magkaroon ng sistema ng ugnayan at pagpapakalat ng
impormasyon at kaalaman sa mga kasapi nito, pag-uugnay ng negosyo at relasyon
ng mga nagpapalaisdaan at bumibili ng isda.
Ang FABC ang inaasahang magsisimula at magsasagawa ng mga hakbang
sa industriya upang maprotektahan ang nagpapalaisdaan at mabawasan ang mga
suliranin ng mga ito.
More news & features...
|